Yoshlar ittifoqining Qoraqalpog‘iston Respublikasi Kengashi Jamoatchilik bilan aloqalar bo‘limi mudiri Furqat Yusupov Qorao‘zakka borib, tuman hokimi Dauletbay Utemuratov bilan suhbatlashdi. Mavzu: Hokim yoshlarga yangi yilda qanday imkoniyatlar yaratib bera oladi?

Suhbat avvalida hokim dastavval tumanda bugungi kunda amalga oshirilayotgan ishlar haqida to‘xtalib o‘tdi.

— 2017-yilda 4 ta obyektda 2,5 milliard so‘mlik rekonstuksiya va ta’mirlash ishlari olib borildi. Jumladan, «Qorao‘zak» OFY markazidagi 13-sonli umumiy o‘rta ta’lim maktabi binosi, «G‘arezsizlik guzari» MFYdagi 2-sonli MTM, «Qorako‘l» OFYdagi 6-sonli MTM ta’mirlandi.

Yoshlar ittifoqi faoli 2018-yilda Yoshlarga oid davlat siyosatini amalga oshirish bo‘yicha qanday ishlar amalga oshirilishi haqida so‘raganida, hokim quyidagicha javob berdi:

— Bu yil tumanimizda 10 MTM quramiz. Hozirgi paytda bitta bog‘cha tayyor. Shuningdek, 5 bog‘chani “0” bahoda sherikchilik asosida berishga tayyorlayapmiz, 1 ta bog‘chani xonadonda tashkillashtirishni rejalashtiryapmiz. Hozircha 7 tasi aniq bo‘lib ulgurdi.

2018-yilda tumanda Baxt uyi qurishni rejalashtirganmiz. Shuningdek, yopiq basseyn qurib, yoshlarga topshiramiz.

U yerda 8 turdagi sport to‘garaklari ish boshlaydi.

Eng muhimi, biz hokimlar, asosan yoshlar uchun ishlaymiz. Ularning bandligini ta’minlash, turli imtiyozlar yaratish, iqtidorini qo‘llab-quvvatlash... Bularning barchasi tumanning salohiyatini oshirishga xizmat qiladi. Xalq turmushidan rozi bo‘ladi. Biz, Yoshlar ittifoqi bilan hamkorlikdan manfaatdormiz!